Este ano a temática do Salón do Libro é 'Mulleres de conto'. En Cabanas enfocamos o traballo cara a esas profesións femininas que participan na creación de contos e que ás veces non están suficientemente visibilizadas. Nós mesmos, cando fixemos unha chuvia de ideas das profesións das que nos lembrabamos... saíannos en masculino! Por iso buscamos a unha muller das distintas profesións que participan nun libro, que nos contasen como é o seu traballo e a súa visión deste mundo de contos. Este é o fermoso cartel deste ano, feito por Ana Villegas.
As compañeiras e compañeiros doutros cursos investigaron sobre a profesión de escritora, de editora, de libreira ou de contacontos, e nós sobre a de ilustradora! Gustounos moito somerxernos nesta marabillosa profesión da man dunha das grandes, Alba Blanco, a autora do cartel do Salón do Libro do ano pasado.
Primeiro investigamos sobre o seu traballo, vimos parte da súa obra e materiais que tiña colgada na súa páxina web (http://www.albablancoboga.com/) e despois fixemos unha videoconferencia con ela para que nos ensinase o seu lugar de traballo e algúns dos seus referentes, así como para que respondese a todas as nosas dúbidas sobre o que fai.
Aquí podedes ver algunhas fotografías sobre como preparamos a entrevista os nenos e nenas de 3º B.
Compartimos tamén fotografías da videoconferencia, na que aprendimos un montón e os nenos e nenas de 3º A e 3º B fixemos mooooooitas mooooitas preguntas.
Despois da charla coa artista, podedes ver como os nenos e nenas de 3º A preparamos algúns dos materiais para o traballo final.
O resultado final coa colaboración dos compañeiros e compañeiras doutros cursos ten forma de conto, é moi especial, esperamos que vos guste. Convidámosvos a ir visitar o traballo completo ao Salón do Libro, en Pontevedra, que estará do 6 ao 29 de abril no Pazo da Cultura. Nós tamén iremos, vémonos alí familias!
Comentarios
Publicar un comentario